Tovarlarni va (yoki) transport vositalarini bevosita bojxona chegarasi orqali olib o‘tishga qaratilgan harakatlar jumlasiga quyidagilar kiradi:
bojxona chegarasini kesib o‘tayotgan jismoniy shaxsning bojxona nazorati zonasiga kirishi;
transport vositasining bojxona chegarasini kesib o‘tish maqsadida O‘zbekiston Respublikasi Davlat chegarasidan o‘tkazish punktiga kirishi;
bojxona hududiga yo‘llash yoki ushbu hududdan tashqariga jo‘natish uchun tovarlarni transport tashkilotlariga yoxud xalqaro pochta va kuryerlik jo‘natmalarini pochta aloqasi operatorlari va provayderlariga topshirish;
jismoniy shaxsning qonunchilikka muvofiq belgilanmagan joylardan tovarlar va (yoki) transport vositalari bilan bojxona chegarasini amalda kesib o‘tishga qaratilgan harakatlari.
Tovarlarni va (yoki) transport vositalarini bojxona hududiga olib kirish shartlari tovarlar va (yoki) transport vositalari bilan bojxona chegarasini amalda kesib o‘tishdan hamda ushbu tovarlar va (yoki) transport vositalari bilan ushbu Kodeksda nazarda tutilgan keyingi barcha harakatlarni ular bojxona organlari tomonidan chiqarib yuborilguniga qadar amalga oshirishdan iborat.
Tovarlar va (yoki) transport vositalari bojxona hududiga olib kirilayotganda tashuvchi ularni tayinlangan bojxona organi joylashgan erga yoki boshqa joyga bojxona Kodeksining 218-moddasida (https://lex.uz/docs/-2876354) belgilangan muddatlarda yetkazib berishi shart.
Bunda tovarlarning holatini o‘zgartirishga yoki ularning o‘rovini buzishga, shuningdek qo‘yilgan plombalarga, muhrlarga va bojxona identifikatsiyasining boshqa vositalariga shikast yetkazilishiga yo‘l qo‘yilmaydi.
Bojxona deklaratsiyasini berish yoki 16-moddaning birinchi qismida (https://lex.uz/docs/-2876354) ko‘rsatib o‘tilgan, tovarlarni va (yoki) transport vositalarini mazkur hududdan bevosita olib chiqishga qaratilgan boshqa harakatlarni amalga oshirish, shuningdek tovarlar va (yoki) transport vositalari bilan bojxona Kodeksida nazarda tutilgan keyingi barcha harakatlarni ular amalda bojxona chegarasini kesib o‘tguniga qadar bajarish tovarlarni va (yoki) transport vositalarini bojxona hududidan olib chiqish shartlari hisoblanadi.
Tovarlarni bojxona hududidan olib chiqishga ular bojxona Kodeksiga muvofiq olib chiqilayotgan tovarlarga nisbatan qo‘llaniladigan tegishli bojxona rejimiga joylashtirilganidan so‘ng yo‘l qo‘yiladi. Tovarlar va (yoki) transport vositalari bojxona nazoratidan o‘tkazilmasdan mazkur hududdan olib chiqilishi mumkin emas.
Bojxona nazorati tashuvchining tovarlarni va (yoki) transport vositalarini olib chiqish niyati borligidan oldindan xabardor qilish asosida bojxona organi tomonidan o‘tkazilishi mumkin.
Янгибозор тумани адлия бўлими юридик хизмат
кўрсатиш маркази бош юристконсулти: Д.Отабаев.
