«Davlat fuqarolik xizmati to‘g‘risida»gi qonunning 48-moddasiga ko‘ra, xodim malaka oshirish yoki qayta tayyorlashda bo‘lgan davrda unga intizomiy jazo, shu jumladan, hayfsan berish mumkin emas. Bu qoida davlat fuqarolik xizmati xodimlarning professional rivojlanishini himoya qilishga qaratilgan bo‘lib, ularning ta’lim jarayoniga to‘sqinlik qilmaslikni ta’minlaydi.
Qaysi holatlarda hayfsan berish man etiladi?
Qonunning 48-moddasi Davlat fuqarolik xizmatchisiga intizomiy jazo qo‘llash mumkin bo‘lmagan bir qator holatlarni belgilaydi. Ular:
— Vaqtincha mehnatga qobiliyatsiz bo‘lgan davrda: Xodim kasal bo‘lganida yoki boshqa sabablar bilan ishga layoqatsiz bo‘lgan vaqtda unga hayfsan berilmaydi.
— Ta’tilda yoki xizmat safarida bo‘lgan davrda: Mehnat ta’tilida yoki xizmat safari bilan boshqa joyda bo‘lgan xodimga intizomiy jazo qo‘llash noto‘g‘ri hisoblanadi.
— Favqulodda vaziyat yoki harbiy xizmatga doir vazifalarini bajarish uchun o‘z xizmat majburiyatlarini bajarishdan ozod etilgan davrda: Maxsus holatlarda xizmat majburiyatlaridan ozod etilgan davrda ham xodimga hayfsan berish mumkin emas.
— Qayta tayyorlashda, malaka oshirishda bo‘lgan va ta’lim olayotgan davrda: Xodimlar o‘z bilim va ko‘nikmalarini oshirish maqsadida ta’lim olayotgan vaqtda ularga intizomiy jazo qo‘llash taqiqlanadi.
Nima qilish kerak?
Agar sizga malaka oshirish davrida yoki yuqorida sanab o‘tilgan boshqa holatlardan birida hayfsan berilgan bo‘lsa, bu qaror qonunga xilof hisoblanadi. Bunday vaziyatda siz hayfsanni bekor qilish uchun tegishli choralarni ko‘rishingiz mumkin:
— Adliya bo‘limiga murojaat qilish: Siz yashash joyingizdagi Adliya bo‘limiga yozma ariza bilan murojaat qilishingiz mumkin. Ular vaziyatni o‘rganib chiqib, qonunbuzarlik aniqlansa, hayfsanni bekor qilish choralarini ko‘rishadi.
— Prokuraturaga ariza berish: Shuningdek, Prokuratura organlariga ham murojaat qilishingiz mumkin. Prokuratura xodimlari ham mazkur holatni o‘rganib, qonun talablariga rioya etilishini ta’minlash choralarini ko‘radi.
Unutmang, qonun sizning huquqlaringizni himoya qiladi. Agar sizga asossiz ravishda intizomiy jazo qo‘llangan bo‘lsa, o‘z huquqlaringizni himoya qilish uchun yuqoridagi organlarga murojaat qilishdan tortinmang.
Tuproqqal’a tuman adliya bo`limi Yuridik xizmat ko`rsatish markazi Bosh yuriskonsulti Sadikova Manzura
